धनगढीः नेपाली काँग्रेसके संस्थापनइतर (देउवा पक्ष)से १५औँ महाधिवेशनहे लेके कैलालीम आपन तयारी तीव्र बनाइल बाटै । 
शेरबहादुर देउवा पक्षसे सोमबार धनगढीमे पत्रकार सम्मेलन कर्तै वडा तहसे क्षेत्र ओ जिल्ला तहसम्म अधिवेशनके लाग आवश्यक तयारी आघ बढाइल जानकारी देहेल बा । 
पत्रकार सम्मेलनम नेपाली कांग्रेसके केन्द्रीय सदस्य नृपबहादुर वड क्षेत्रीय ओ जिल्ला तहम निर्वाचनके लाग जिम्मेवारी तोक्के संयोजक खटासेकल कैके बताइल बाट । उहाके अनुसार वडा, गाउँपालिका ओ नगरपालिका तहम समेत जिम्मेवारी बाँडफाँट कर्सेकल बा । 
उहा असोज १५ गतेसे वडा अधिवेशन सुरु कैके क्रमशः माथिल्लो तहके अधिवेशन सम्पन्न कर्ती १५औँ महाधिवेशनहे भव्य रूपम सम्पन्न कर्ना तयारी हूइती रहल कैके बताइल बाटै । 
वडमे १४औँ महाधिवेशनसे निर्वाचित सभापति शेरबहादुर देउवा नेतृत्वके कार्यसमितिहे नै १५औँ महाधिवेशन कर्ना  अधिकार रहल दाबी कर्ल । कोनो व्यक्ति ओ समूह और पक्षम लग्ती किल सिङ्गो नेपाली कांग्रेस नै उहै गिल अर्थ लगाइ नैहूइना उहाके भनाइ बा ।
‘कोनो व्यक्ति एहेर –ओहर जैतिकिल सिङ्गो कांग्रेस गील कैके नैबूझेपरत,’ वड कलै , ‘आधिकारिक कांग्रेस हाम्रेही हूइती ।’
पत्रकार सम्मेलनम राष्ट्रिय सभा सदस्य ओ नेपाली कांग्रेस कैलालीके सभापति नारायणदत्त भट्टलगायतके नेताहूकनके सहभागिता रहे । उहाचहूक्रे पार्टीके विधानअनुसार अधिवेशन प्रक्रिया आघे बढैना बताइल बाटै ।