कैलालीके धनगढीमे २१ वर्षीया कविता जोशी पाठकके मृत्यु प्रकरणमे प्रहरीहुक्र उहाके श्रीमान् ओ सासुहे पक्राउ कर्ले बाटै । धनगढी उपमहानगरपालिका–६, मटियारीस्थित आपन घरके कोठामे कविता मृत फेला परल रहिन् ।
प्रहरीके अनुसार रातके साढे ८ बजेओहोर घटनाबारे सूचना प्राप्त होके प्रहरी टोली घटनास्थलमे पुगल रहिन । मृतकके माइती पक्ष तत्काल बझाङमे रहके घटनास्थलहे रातभर सुरक्षित धर्ले रहित । काल बिहानके प्रहरी निरीक्षक लोकराज जोशीके नेतृत्वमे सोकोसहितके टोलीहुक्र घटनास्थलके मुचुल्का तयार पारल रहित । 
कविताके श्रीमान् सरोज पाठक कात्तिक ७ गते श्रीमतीहे झुल्के आत्महत्या करल कैके कानुनबमोजिम प्रक्रिया आघ बढैलाग ओ शव बुझेलाग निवेदन देहेल रहित ।
तर, कात्तिक ८ गते मृतकके माइती पक्षसे श्रीमान् सरोज पाठक ओ सासु कमला जोशी पाठकविरुद्ध आत्महत्या कर्ना दुरुत्साहन देहेल कसुरमे किटानी जाहेरी देहेल रहित । प्रहरीहुक्र जाहेरी दर्ता कैके सोही दिन सरोजहे पक्राउ कर्ले रहित । 
शव परीक्षणपाछे मृतकके ससुरा नाता पर्ना यज्ञराज पाठक शव बुझ्के लैगिल रहित । प्रहरीहुक्र कात्तिक ९ गते मृतककी सासु कमला जोशी पाठकहे समेत पक्राउ करल जनाइल बाटै । 
जिल्ला प्रहरी कार्यालय कैलालीके सूचना अधिकारी प्रहरी नायब उपरीक्षक योगेन्द्र तिमिल्सिनाके अनुसार घटनाबारे थप अनुसन्धान हुइती बा । 
यहा, माइती पक्षहुक्र कल शव समेत हेरे नैदेके अन्त्येष्टि करल गुनासो कर्ले बाटै । मृतककी भैजी तुलसी जोशी नन्दके शव समेत हेरे नैपाइल बतैलिन् । माइती पक्षहुक्र प्रहरीके भूमिकाउपर पनि प्रश्न उठाइल बाटै ।