जानकी गाउँपालिकामे दिवंगत मनैनहुकन पार्थिव शरीरहे अन्तिम संस्कारके लाग घाटसम्म पुगाइलाग सहजीकरण कर्ना उद्देश्यले ‘महाप्रस्थान यान’ भित्र्याइल बाटै ।
मृत्युपश्चात् दिवंगत मनैनके पार्थिव शरीरहे सम्मानजनक रूपमे अन्तिम संस्कारस्थलसम्म पुगैना सहज हुइना कैके उद्देश्यले गाउँपालिकासे उक्त यान भित्र्याइल बाटै ।  महाप्रस्थान यानके आपूर्ति कर्ना कम्पनीसे गाउँपालिका अध्यक्ष गणेश चौधरीहे यानके साँचो हस्तान्तरण कर्ले बाटै ।
साँचो हस्तान्तरण कार्यक्रममे गाउँपालिका उपाध्यक्ष लालमती कठरिया, कार्यपालिका सदस्यहुकन, प्रमुख प्रशासकीय अधिकृत ज्योत्स्ना भट्ट जोशी लगायतके उपस्थिति रहल रहे । 
दुःखके घडीमे शोकसन्तप्त परिवारहे सहयोग पुगैना उद्देश्यले लानल यी सेवाले अन्तिम संस्कारके प्रक्रियाहे सहज, व्यवस्थित ओ सम्मानजनक बनैना महत्त्वपूर्ण भूमिका खेल्ना अपेक्षा कर्ले बाटै । 
महाप्रस्थान यान सञ्चालनमे आके दिवंगत मनैनके पार्थिव शरीरहे घाटसम्म पुगैना स्थानीय परिवारहे सहज हुइना विश्वास कर्ले बाटै । गाउँपालिकाके यहे पहलसे नागरिकहे आवश्यक सेवासुविधा उपलब्ध करैना के सँगमे  सामाजिक ओ मानवीय उत्तरदायित्व निर्वाहमे समेत सहयोग पुग्ना महसुस कर्ले बाटै ।