कैलालीके गेटास्थित शहीद दशरथ चन्द स्वास्थ्य विज्ञान विश्वविद्यालयसे आपन ब्लड बैंक (रक्तसञ्चार केन्द्र) सञ्चालन कर्ना तयारी कर्ले बाटै । ब्लड बैंक स्थापनाके लाग विज्ञ टोलीहुक्र अध्ययन कर्सेकल बाटै कलेसे हलि सञ्चालनमे लन्ना प्रक्रिया आगे बढाइल बाटै । 
विश्वविद्यालयसे ब्लड बैंक सञ्चालनके लाग तयारी आघ बढैले से फेन तत्काल आवश्यक पर्ना उपकरण कलेसे उपलब्ध नैहुइल विश्वविद्यालयहुक्र जनाइल बाटै ।  विश्वविद्यालयमे अत्याधुनिक उपकरणसे रहके फेन यी सब उपकरण तत्काल प्रयोगमे लाने सेक्ना अवस्था नैरहल विश्वविद्यालयके उपकुलपति डा. सुनिलकुमार जोशी बतैल । विश्वविद्यालयमे उपलब्ध उपकरणके प्राविधिक अवस्था ओ सञ्चालनयोग्यता मूल्याङ्कन कर्ना काठमाडौँसे रक्तसञ्चार ओ ब्लड बैंक विज्ञ डा. विपिन नेपालहे आमन्त्रण कर्ले रहित । डा. नेपाल नेतृत्वके टोलीहुक्र करल निरीक्षणके क्रममे विश्वविद्यालयमे रहल उपकरण अत्याधुनिक प्रविधिके  होके फेन उइनिन्हे पूर्णरूपमे प्रयोगमे लन्ना सेवा विस्तार हुइल एकसे दुई वर्ष लागे सेक्ना देखाइल बा । 
‘ब्लड बैंक सञ्चालनके प्रारम्भिक चरणमै आवश्यक पर्ना रगतके समूह पहिचान (ब्लड ग्रुपिङ( लगायतके आधारभूत उपकरण कलेसे विश्वविद्यालयमे उपलब्ध नैहो ,’ उपकुलपति जोशी कलै , ‘यम्ने तत्काल सेवा सुरु कर्ना आवश्यक सामग्री खरिद करेपर्ना हुइल बा ।’ विश्वविद्यालय प्रशासनसे आवश्यक उपकरण खरिदके लाग बजेट स्वीकृत कराके प्रक्रिया आघ बढैना तयारी कर्ले बाटै । यथाशीघ्र उपकरण खरिद कैके सेवा सञ्चालनमे लन्ना लक्ष्य धरल उपकुलपति जोशी बतैल । 
आपन ब्लड बैंक सञ्चालनमे आके बिरामी ओ सेवाग्राहीह रगत ओ रगतजन्य सेवा उपलब्ध कराइलाग सहज हुइना जोशी बतैल । उहाके अनुसार विश्वविद्यालयसे सामान्य ब्लड बैंक सञ्चालनमे किल सीमित नैहोके रगतके विभिन्न तत्व छुट्टैना आधुनिक प्रयोगशाला स्थापना कर्ना योजना बा । ओकरसँगे  एन्टीबडीमे आधारित इम्युन थेरापीसम्मके उच्चस्तरीय सेवा उपलब्ध करैना लक्ष्य विश्वविद्यालयहुक् धर्ले बाटै । ‘विश्वविद्यालयसे सामान्य ब्लड बैंक सञ्चालनमे किल सीमित नैहोके रगतके विभिन्न तत्व छुट्टैना आधुनिक प्रयोगशाला स्थापना कर्ना योजना बनाइल बाटै । साथमे, एन्टीबडीमा आधारित इम्युन थेरापीसम्मके उच्चस्तरीय सेवा उपलब्ध करैना लक्ष्य हमे्र धर्ले बाटी ,’ उपकुलपति जोशी कलै ।