कञ्चनपुरमे भारतसे भन्सार छली कैके लानल १० लाख ४९ हजार ३८५ रुपैयाँ मूल्य बराबरके सामान प्रहरीहुक्र बरामद कर्ले बाटै । अवैध रूपमे भित्र्याइल सामान बरामद कैके प्रहरीहुक्र तीन जनाहे पक्राउसमेत कर्ले बाटै ।
जिल्ला प्रहरी कार्यालय कञ्चनपुरके अनुसार कात्तिक ८ ओ ९ गते जिल्लाके विभिन्न स्थानसे अवैध रूपमे भित्र्याइल सामान बरामद कर्ले रहित ।
जिल्ला प्रहरी कार्यालय ओ मातहतके टोलीसे तेल, दाल, नरिवल, बिँडी, सुर्ती, खुर्सानी ओ मिठाईलगायतके सामान बरामद कर्ले बाटै । यी सामानके मूल्य २ लाख ५७ हजार ९०० रुपैयाँ रहल बा । अस्तके इलाका प्रहरी कार्यालय गड्डाचौकीसे चप्पल, साडी, कपडा, खाद्यान्न ओ किराना सामान कैके १ लाख १६ हजार ३२५ रुपैयाँ मूल्य बराबरके सामान बरामद कर्ले बाट ।
अस्तके, सुदूरपश्चिम प्रदेश प्रहरी कार्यालय धनगढी ओ इलाका प्रहरी कार्यालय बेलौरीके टोलीहुक्र साइकलके पाटपुर्जा, प्लास्टिक, ट्युब, डोरी, तेल, मिठाई ओ एकथो मोटरसाइकलसहित एक लाख ८७ हजार ९६० रुपैयाँ मूल्य बराबरके सामान बरामद कर्ले बाटै । जिल्ला प्रहरी कार्यालयके टोलीहुक्र ६०० बण्डल बिँडी, प्लास्टिकके झोला, तेल ओ चिनी कैके तीन लाख १८ हजार ६०० रुपैयाँ मूल्य बराबरके सामानसमेत बरामद करल प्रहरीहुक्र जनाइल बाटै ।प्रहरी चौकी टेडुवासे २० किलो माछा ओ पेय पदार्थ बरामद कैके नष्ट कर्ल बाटै । यी सामानके मूल्य ११ हजार ४०० रुपैयाँ रहल बा ।
अस्तके, भीमदत्त नगरपालिका–१८ स्थित कारागार रोडसे अवैध सामानसहित तीन जाने पक्राउ परल बाटै ।पक्राउ पर्नामे भीमदत्त नगरपालिका–२ के ५० वर्षीय लप्टन चौधरी, वडा नम्बर ११ के ४४ वर्षीय किसनदत्त जोशी ओ वडा नम्बर १७ के ३० वर्षीय लबराज चटौत रहल बाटै ।
उहाहुकनके साथे दुई थो मोटरसाइकल, मोटरसाइकलके चेन, स्प्रोकेट, ब्रेकसम्बन्धी सामग्री ओ प्लास्टिक बरामद करल प्रहरीहुक्र जनाइल बाटै । बरामद मोटरसाइकलके मूल्य एक लाख रुपैयाँ ओ अन्य सामानके मूल्य ५७ हजार २०० रुपैयाँ कैके कुल एक लाख ५७ हजार २०० रुपैयाँ रहल बा ।
प्रहरीके अनुसार बरामद करल सामान भन्सार कार्यालय पठाइल बाटै ।
