सम्भावित भारी वर्षा, बाढी ओ पहिरोके जोखिमके कारण सुदूरपश्चिमके विभिन्न रुटम चल्ना लम्मा दूरीके सार्वजनिक बस सेवा प्रभावित होके यात्रुहूक्र अलपत्र परल बाट । बस सञ्चालनम रोक लगैना निर्णयबारे पूर्वसूचना नैपाके उपचारलगायत भारतसे विभिन्न कामके लाग सुदूरपश्चिमके पहाडी जिल्लासे धनगढी आइल यात्रुहूक्र समस्याम परल बाट ।
शुक्रबारसे आइतबारसम्मके लाग विभिन्न यातायात समितिसे लम्मा दूरीके बस सञ्चालनम रोक लगाइल बाट । सुदूरपश्चिमसे पहाडी रुटसँगे काठमाडौं, पोखरा लगायत पूर्वतर्फ जैना  लम्मा दूरीके बससमेत तत्कालके लाग सञ्चालन नैकर्ना निर्णय हूइल बा ।
लाम्मा दूरीके बस सञ्चालनम रोक लाग्के छोटी दूरीम चल्ना सवारीसाधनमार्फत यात्रा करपर्ना अवस्था आइल यात्रुहूकनके भनाइ बाटिन् । कौनो रुटम छोटी दूरीके सवारीसाधनसमेत पर्याप्त नैहोके यात्रुहूकन थप असहज हूइल बाटिन् । 
सम्भावित विपद्के जोखिमहे मध्यनजर कर्ती सरकारहूक्र लम्मा दूरीके सवारीसाधन सञ्चालनम सावधानी अपनाइलाग आग्रह कैके यातायात व्यवसायीहूक्र फेन सेवा स्थगित करल रहित् ।
सुन्दर सुदूरपश्चिम यातायात प्रालिके कोषाध्यक्ष गोविन्द शाहके अनुसार बिहीबारसे लम्मा दूरीके रात्री बस सञ्चालनम रोक लगाइल रह । शुक्रबार बिहानसे सुदूरपश्चिमके विकट ओ पहाडी क्षेत्रमे जैना बससमेत सञ्चालन नैकर्ना उहा बतैल ।

‘सरकारके निर्देशन ओ मौसमके अवस्थाहे ध्यानम देके तत्कालके लाग लम्मा दूरीके बस सञ्चालन नैकर्ना निर्णय करल बाट ।,’ शाह कल, ‘जोखिम कम हूइल जिल्लाम  वर्षाके अवस्था हेर्के सेवा सञ्चालन कर्बी ।’
सुदूरपश्चिम यातायातसे धनगढीसे काठमाडौं ओ पोखरातर्फ जैना रात्री बस दुई दिनसम्म सञ्चालन नैकर्ना निर्णय करल बाट । धनगढीसे पोखराके लाग दैनिक दुईथो ओ काठमाडौंके लाग १३ थो रात्री बस सञ्चालन हुँइती आइल रह । तर, मौसम प्रतिकूल होके यी बसह गन्तव्यतर्फ पठाइल नैहो । 
यातायात व्यवसायीहूक्र खराब मौसमके कारण लाम्मा दूरीके यात्राम जोखिम बढे सेक्ना होके यात्रु ओ चालकके सुरक्षाहे ध्यानम देके सेवा स्थगित करल बताइल बाट । मौसमम सुधार आइ तब सम नियमित रूपम बस सञ्चालन कर्ना उहाके भनाइ बाटिन् ।
पछिल्लो समय देशके विभिन्न स्थानम बाढी, पहिरो ओ डुबानके जोखिम बढ्ती रहल कारण सार्वजनिक यातायात सञ्चालनम समेत सावधानी अपनाइल बाट । व्यवसायीहूक्र मौसमके अवस्था हेर्के किल यात्रुहूकन गन्तव्यतर्फ पठैना बताइल बाट ।
मौसमम सुधार नैआइत सम्म अनावश्यक लाम्मा दूरीके यात्रा नैकर्ना ओ यात्रा करपर्ना अवस्था हूइलसे सम्बन्धित यातायात कम्पनीसँग बस सञ्चालनके अवस्थाबारे जानकारी लेके कील यात्रा कर्ना व्यवसायीहूक्र यात्रुहूकन आग्रह करल बाट ।