धनगढी । सुदूरपश्चिम प्रदेशके मुख्यमन्त्री खगराज भट्ट भौतिक फोहोर सफा करहस् प्रदेशके बजेटम देखाइल बेथिति ओ विकृति फेन सफा कर्ती नीति, विधि ओ पद्धतिम आधारित बजेट निर्माण कर्ना बताइल बाटै । 
संविधान दिवस ओ राष्ट्रिय दिवसके पूर्वसन्ध्याम मुख्यमन्त्री ओ मन्त्रिपरिषद्के कार्यालय, भौतिक पूर्वाधार विकास मन्त्रालय ओ मुख्यमन्त्री निवास परिसरम आयोजित सरसफाइ कार्यक्रमम सहभागी हूइती मुख्यमन्त्री भट्ट समाजके हरेक क्षेत्रम सरसफाइ आवश्यक रहल बताइल बाटै ।
उहाँ कोनो फेन क्षेत्रके सरसफाइहे सभ्यता, संस्कार ओ संस्कृतिके पहिचान झल्कैना उल्लेख कर्ती भौतिक फोहोरसँगे शासन व्यवस्था, नीति, प्रक्रिया ओ बजेटम देखाइल बेथितिके समेत सफाइ आवश्यक रहल बतैल बाटै ।
नेपाली जनताके लम्मा संघर्ष, बलिदान ओ राष्ट्रिय सहमतिके जगम निर्माण हूइल नेपालके संविधान सब वर्ग, जाति, क्षेत्र ओ लिंग नागरिकके साझा दस्ताबेज हूइल उहाँके भनाइ रलिन् । संविधानसे जनताके सर्वोच्चताहे स्थापित करल उल्लेख कर्ती मुख्यमन्त्री भट्ट राजनीतिक व्यवस्था परिवर्तनपाछे नागरिकके अवस्था परिवर्तन कर्ना चरणम पूगल बाती कना बात बतैल बाटै ।
“व्यवस्था परिवर्तनपाछे अवस्था परिवर्तनके चरणम बाटी । ओकर लाग हरेक क्षेत्रम सुधार ओ सरसफाइ आवश्यक बा,” मुख्यमन्त्री भट्ट कल । 
प्रदेशम बजेट शून्यताके अवस्था अन्त्य कर्ती नीति, विधि ओ पद्धतिम आधारित होके हली बजेट लन्ना तयारी हूइती रहल उहाँहूक्र जानकारी देहेल बाटै ।
कार्यक्रमम सुदूरपश्चिम प्रदेशके भौतिक पूर्वाधार विकासमन्त्री ओमविक्रम भाट पछिल्लो समय हूइल जेनजी आन्दोलनके क्रमम विभिन्न स्थानम क्षति पुगल कारण सेवाग्राही बैठना स्थान ओ सरकारी कार्यालय परिसरम फोहोर जम्मा होके सरसफाइ कर्तीरहल बताइल बाटै ।
ओस्तके, राज्यमन्त्री जानकीदेवी कुँवर सरसफाइ स्वच्छता ओ स्वास्थ्यके दृष्टिसे समेत अत्यन्त महत्वपूर्ण रहल बतैती सरसफाइ अभियानहे ग्रामीण क्षेत्रसम्म विस्तार करेपर्ना  आवश्यकता रहल बताइल बाटै ।
संविधान दिवसके अवसरम काल आयोजना हुइना सार्वजनिक कार्यक्रमके पूर्वसन्ध्याम आज प्रदेश सरकारके विभिन्न कार्यालय ओ परिसरम सरसफाइ कार्यक्रम आयोजना कर्ले बा ।