कैलालीम कुकुरके मासु कती बिक्री–वितरण करल आरोपम एक जाने ६५ वर्षीय व्यक्ति पक्राउ परल बाटै । 
गोदावरी नगरपालिका–२ के सुरेश नेपालीहे खानाके लाग बिक्री करेलाग काट्के धरल मासु कुकुरके हूइल सूचना आके प्रहरीहूक्र नियन्त्रणम लेहेल बाट । 
जिल्ला प्रहरी कार्यालय कैलालीके अनुसार कुकुरके मासु बिक्री–वितरण हूइती रहल सूचना पाके प्रहरी टोलीहूक्र नेपालीहे नियन्त्रणम लेहेल बाट । 
 बरामद करल मासु कुकुरके हो वा अन्य कोनो जनावरके कना बाद पुष्टि हूइल नैहो । प्रहरीहूक्र मासुके नमुना प्रयोगशालाम परीक्षणके लाग पठैना तयारी कर्ल बाट । प्रयोगशाला परीक्षणपाछे किल मासुके वास्तविक स्रोत खुल्ना प्रहरीहूक्र जनाइल बाट ।
पक्राउ परल नेपालीहे इलाका प्रहरी कार्यालय मालाखेतीसे नियन्त्रणम लेहेल बाट । घटनाबारे थप अनुसन्धान हूइती रहल जिल्ला प्रहरी कार्यालय कैलालीसे जनाइल बाट ।