धनगढी उपमहानगरपालिकामे शनिबारीय महिला उद्यम बजारहे पुनः सञ्चालनम लन्ना हूइल बा । वर्षायामके कारण कूछ समय रोकल उद्यम बजार यहे असोज २४ गतेसे पुनः सञ्चालन करे लागल बाटै ।  
धनगढी उपमहानगरपालिका पछिल्लो तीन वर्षसे जेन्जीमार्गमे उद्यम बजार सञ्चालन कर्ती आइल बा । वर्षायामहे मध्यनजर कर्ती कूछ समय स्थगित करल बजारहे पुनः निरन्तरता देहे लागल उपमहानगरपालिकाहूक्र जनाइल बाटै ।
पुनः सञ्चालन हुइना उद्यम बजारके लाग आवेदन खुला करल उपमहानगरपालिकाकी उपप्रमुख कन्दकला कुमारी राना बतैलिन् । उहाके अनुसार बजारम बेरोजगार ओ सीप हूइल महिलाहूकन प्राथमिकता देना बाटिन् । महिलाहूक्र आप्नह उत्पादन करल हस्तकला सामग्री ओ मौलिक खानाके परिकार बिक्री कैके आम्दानी करे सक्ही ।

२०८१ सालसे सुरु करल महिला उद्यम बजारसे महिलाहूकन् स्वरोजगार बनैनाके साथमे स्थानीय सीप, कला, संस्कृति ओ मौलिक खानपानके संरक्षण ओ प्रवद्र्धनमे समेत सहयोग पुगैना उपमहानगरपालिकाके विश्वास बा ।
‘शनिबार एक दिन होके फेन्  दिदीबहिन्याहूक्र श्रमके सम्मान, आर्थिक सशक्तीकरणके अभियान’ कना नारासहित सञ्चालन हुँइती आइल उद्यम बजारहे महिलाके आर्थिक सशक्तीकरणसँग जोडल बाटै । महिलाहूक्र आर्थिक रूपमे सक्षम बनैती परिवारके आयआर्जनमे योगदान पुगैना ओ घरेलु हिंसा न्यूनीकरणमे समेत सहयोग कर्ना उद्देश्य रहल उप–नगरप्रमुख राना बतैलिन् ।
उद्यम बजारमे दुईतर्फ विभिन्न प्रकारके स्टल धर्हि । एकतर्फ महिलाहूक्र उत्पादन करल हस्तकलाके सामग्री बिक्रीके लाग धर्ना बाटिन् । दुना–टपरी, ढकिया, आरनके सामग्री, चुरीया, पोतेलगायत स्थानीय सीप ओ कलामे आधारित सामग्रीके स्टल रहना बा ।
ओस्तके, औरे तरफसे सुदूरपश्चिमके मौलिक ओ परम्परागत खानाके परिकारके स्टल रही । निसौसे, माणा, सेलरोटी, ढिक्री, कर्ता, बटुकलगायत स्थानीय ओ अर्गानिक परिकारके स्वाद लेहे सेक्ना उप–नगरप्रमुख राना बतैलिन् ।
उद्यम बजारहे महिला उद्यमीके उत्पादन बिक्री कर्ना स्थानमे किल सीमितमे नैधर्के सब उमेर समूहके लाग मनोरञ्जन ओ घुमघामके गन्तव्यके रूपमे विकास कर्ना तयारी करल बा ।  बालबालिकाके लाग खेल्ना सामग्री ओ ज्येष्ठ नागरिकके लाग भजन–कीर्तन ओ मनोरञ्जनात्मक गतिविधि समेत सञ्चालन कर्नाबाट ।
धनगढीके महिलाहूक्र आपनम हूइल सीपहे व्यवसायम रूपान्तरण कर्ती स्वरोजगार बन सेक्ना होके उद्यम बजारम सहभागी हुइना इच्छुक महिलाहूकन आवेदन देहेलाग उपमहानगरपालिकासे आग्रह कर्ल बाट ।