कैलालीके धनगढी उपमहानगरपालिका–१०, जुगेडामे ‘निसर्ग इन्डो–नेपाल जुगेडा कप–२०८३’ आयोजना हुइना बा । प्रतियोगिता असोज २० गतेसे २४ गतेसम्म सञ्चालन हुइना आयोजकहूक्र जनाइल बाट ।
ग्रामीण क्षेत्रमे लुकल खेल प्रतिभाके पहिचान, विकास ओ प्रवद्र्धन कर्ना उद्देश्यम संयुक्त राना जनचेतना परिवारहूक्र प्रतियोगिता आयोजना करे लागल बाट । प्रतियोगितामे नेपाल ओ भारतके ८ टोलीके सहभागिता रहना बा ।
प्रतियोगिताके विजेतासे २ लाख रुपैयाँ नगदसहित ट्रफी, मेडल ओ प्रमाणपत्र प्राप्त कर्ना बा । कलेसे उपविजेतासे १ लाख रुपैयाँ नगदसहित मेडल ओ प्रमाणपत्र पैना बाटिन् । अस्तके, सेमिफाइनलमे पराजित हुइना दुई टोलीहूक्र  २०÷२० हजार रुपैयाँ प्रदान कर्ना आयोजक हूक्र जनाइल बाट । 
प्रतियोगिताके विषयम शुक्रबार धनगढीम आयोजित पत्रकार सम्मेलनम आयोजकहूक्र जानकारी देहेल बाट ।  कार्यक्रमम प्रमुख अतिथिके रूपम बालरोग विशेषज्ञ डा. प्रदीप मिश्रके उपस्थिति रहल रह ।
आयोजक संयोजक सुरज रानाके अनुसार जुगेडा कप खेलकुद प्रतियोगिताम किल सीमित नैहोके ग्रामीण क्षेत्रके प्रतिभाके पहिचानसँगे स्थानीय कला, संस्कृति ओ पर्यटन प्रवद्र्धन कर्ना उद्देश्यम आयोजना करल बाट ।  प्रतियोगितासे नेपाल–भारतबीचके खेलकुद ओ सांस्कृतिक सम्बन्धहे समेत थप मजबुत बनैना अपेक्षा करल उहा बतैल ।
प्रतियोगिताके मुख्य प्रायोजक केयर टेकर हस्पिटल रहल बा कलसे धनगढी उपमहानगरपालिका–१० वडा कार्यालयसहित विभिन्न संघसंस्थाके सहयोग रहल आयोजकहूक्र जनाइल बाट ।