दसैँ–तिहार ओ छठहे लक्षित कर्ती सुदूरपश्चिममे प्रहरीहुक्र  सुरक्षा व्यवस्था कडा पारल बाटै । 
चोरी, लुटपाट, ठगीसे सीमा क्षेत्रमे हुइना अवैध गतिविधि नियन्त्रण कर्ना प्रदेशभर झन्डै पाँच हजार प्रहरी परिचालन कर्ले बाटै । प्रदेश प्रहरी कार्यालयके प्रहरी उपरीक्षक महेन्द्र नेपाल चाडपर्वमे यात्रुके चाप ओ बजारमे भीडभाड बढ्ना होके प्रदेशभर ११ सयसे ज्यादा  स्थानमे प्रहरी ड्युटीके व्यवस्था मिलाइल जानकारी देल ।

उहा चाडपर्व लक्षित सुरक्षा योजना बनाके कार्यान्वयनमे लन्ना बतैल । सुरक्षा योजनाअनुसार बसपार्क, राजमार्ग, बजार, बैंक ओ वित्तीय संस्था ओ सीमा नाकामे नियमित गस्ती ओ आकस्मिक चेकजाँच हुइती रहल प्रहरीहुक्र जनाइल बाटै । प्रहरी उपरीक्षक महेन्द्र नेपाल सम्भावित जोखिमके आधारमे प्रहरी परिचालन कैके नागरिकके सुरक्षा ओ सहज आवागमनहे प्राथमिकता देहेल बतैल ।
उहाके अनुसार भारतसे फिर्ता हुइना यात्रुके चापहे ध्यानमे धर्ती सीमा नाकामे निगरानी बढाइल बाटै । ओस्तके यात्रु सहायता कक्ष, कमान्ड पोस्ट ओ सर्च अप्रेसनमार्फत सुरक्षा निगरानी प्रभावकारी बनैना प्रहरीके योजना बा । तालिमप्राप्त कुकुरमार्फत फेन चेकजाँच हुइती रहल प्रदेश प्रहरीहुक्रे जनाइल बाटै । 
प्रदेशके सबैसे ज्यादा जनसंख्या हुइल कैलालीमे चाडपर्वके सुरक्षाके लाग एक हजार १४६ प्रहरी परिचालन कर्ले बाटै । मोबाइल ओ पैदल गस्ती, सादा पोसाकके प्रहरी, क्विक रेस्पोन्स टिम (क्यूआरटी) ओ स्ट्राइकिङ टोलीहुकन तयारी अवस्थाम धर्के जिल्ला प्रहरी कार्यालय कैलालीसे जनाइल बाटै ।  चाडपर्व घर ओ पसल लम्मा समय खाली हुइ सेक्ना होके प्रहरीहुक्रे ढोका–झ्याल सुरक्षित धर्ना , छिमेकीहुकन जानकारी देहेलाग ओ बहुमूल्य सामानके सुरक्षा कर्ना आग्रह फेन कर्ले बाटै ।