सुदूरपश्चिम प्रदेशकै प्रमुख रेफर केन्द्रके रूपम रहल सेती प्रादेशिक अस्पतालम २१ दिनसे सिटी स्क्यान सेवा बन्द हाके सेवाग्राही समस्याम परल बाटै । सिटी स्क्यान मेसिनके पार्टपुर्जा बिगर्के सेवा अवरुद्ध होके अस्पताल प्रशासनहूक्र जनाइल बाट । प्रदेशके नौ थो जिल्लासे उपचारके लाग एैना बिरामीहूक्र सिटी स्क्यान सेवा नैपाके समस्या झेले पर्ना बाध्यता बाटिन् । विशेषकैके आर्थिक अवस्था कमजोर होके ओ विपन्न नागरिकहूकन उपचारके प्रमुख गन्तव्य रहल सेती अस्पतालम सेवा बन्द होके कत्रापो बिरामीहूक्र निजी अस्पतालम महँगो शुल्क तिर्के सिटी स्क्यान कर्ना बाध्य हूइल बाटै । 
अस्पतालम दैनिक १ हजार २ सयसे १ हजार ५ सयसम्म बिरामीहूक्र विभिन्न सेवा लेना कर्ले बाटै । सिटी स्क्यान सेवा फेन अस्पतालके महत्वपूर्ण सेवामध्ये एक हो। सेवा बन्द होके उपचारके लाग अस्पताल पुगल बिरामी थप आर्थिक भार व्यहोर्ना बाध्य हूइल बाटै । 
सेती प्रादेशिक अस्पतालके सूचना अधिकारी किशोरप्रसाद श्रेष्ठके अनुसार जीई कम्पनीसँग खरिद करल सिटी स्क्यान मेसिनके पार्टपुर्जा बिगर्के सेवा सञ्चालनम समस्या आइल बा ।  बिग्रल पार्ट नेपालम उपलब्ध नैहूइना होके विदेशसे मगाइ पर्ना उहा बतैल ।
“बिग्रल पार्ट विदेशसे लानेपर्ना होके कूछ समय लागल बा । पार्ट आब काठमाडौंसम्म आइपुगल बा । आब एक साताभित्रर मेसिन तयार होके सिटी स्क्यान सेवा पुनः सञ्चालनम एैना बा । ,” सूचना अधिकारी श्रेष्ठ कल ।
सेती प्रादेशिक अस्पतालम सिटी स्क्यान सेवा २०७९ साल पुससे सञ्चालनम आइल बा ।  अस्पतालके अनुसार दैनिक करिब २० जाने बिरामीहूक्र सिटी स्क्यान सेवा लेती आइल रहित ।सेवा बन्द होके अस्पतालम उपचारके लाग  बिरामीहूक्र स्वास्थ्य सेवा प्रभावकारी हुइ नैसेकल हो कैके गुनासो कर्ले बाटै । उहाहूक्र अस्पतालमे पटक–पटक देखैती आइल समस्या तत्काल समाधान करेपर्ना माग कर्ले बाटै । राजनीतिक नेतृत्वसे अस्पतालके निरीक्षण हुइना कर्ले से फेन समस्या समाधान ओ निर्णयके कार्यान्वयनम अपेक्षित प्रगति हुइ नैसेकल सेवाग्राहीके गुनासो बा ।
मुख्यमन्त्री खगराज भट्ट समेत सेती प्रादेशिक अस्पतालके अवस्था ओ समस्याबारे पटक–पटक निरीक्षण कर्ले स्े फेन ओकरअनूसार सुधारके अनुभूति हूइ नैसेकल सेवाग्राहीके आरोप बा ।अस्पताल प्रशासनके अनुसार सिटी स्क्यान मेसिनम आइल समस्यासँगे अस्पतालके विभिन्न वार्डमे आवश्यकताअनुसार दक्ष जनशक्तिके समेत अभाव रहल बा । अस्पतालहे प्रभावकारी रूपम सञ्चालन कर्ना आवश्यकताअनुसार दक्ष जनशक्ति ओ स्रोतसाधन उपलब्ध कराइपर्ना प्रशासनके माग बा ।
सेवाग्राहीहूक्रे कल प्रदेशकै प्रमुख रेफर अस्पतालम सिटी स्क्यानजस्ते अत्यावश्यक सेवा लम्मा समय बन्द हुइ नैहेलाग गुणस्तरीय स्वास्थ्य सेवा सहज ओ सरल रूपम उपलब्ध कराइलाग सरकारसँग माग कर्ले बाटै ।