सुदूरपश्चिम प्रदेश सरकारके चालु आर्थिक वर्षके बजेटउपर संसदीय छानबिन हुइना हुइल बा । मंगलबार प्रदेशसभासे बजेट पारित हुइले से फेन् बजेटमे देखाइल कैके बेथितिबारे छानबिन कैके प्रतिवेदनके आधारमे पूरक बजेट लन्ना सहमति हुइल बा । 
सभामुख भीमबहादुर भण्डारीसे बजेटके अध्ययन कैके कात्तिक २० गतेभित्रर प्रतिवेदन बुझैना कैके दलीय प्रतिनिधित्वके आधारमे सात सदस्यीय संसदीय छानबिन समिति गठन कर्ना जानकारी देहेल बाटै ।‘प्रदेशसभामे प्रस्तुत हुइल बजेटके विषयमे अध्ययन कैके कात्तिक २० गतेभित्रर प्रतिवेदन पेस कर्ना कैके दलीय प्रतिनिधित्वके आधारमे सात सदस्यीय संसदीय समिति गठन कर्ना । उक्त समितिले पेस करल प्रतिवेदनके आधारमे पूरक बजेट लन्ना ,’ मंगलबारके प्रदेशसभा बैठकमे सभामुख भण्डारी कलै ।
बजेटमे देखाइल बेथिति छानबिन कर्ना सहमतिपाछे किल सरकारके नेतृत्व कर्ती नेपाली कम्युनिस्ट पार्टी (नेकपा) के प्रदेशसभा सदस्यहुक्र बजेट पारित कर्ना तयार हुइल रहे । बजेट पारित कर्ना आघे बैठल नेकपा संसदीय दलसे तीन महिनासे बजेट शून्यताके अवस्था अन्त्य कर्ना आइतबार सार्वजनिक हुइल बजेट पारित कर्ना ओ ओमने देखाइल बेथितिहे छानबिनमार्फत हटैना निर्णय करल रहे । सोही निर्णयमे एमाले फेन सहमत हुइल बा । 
आर्थिक वर्ष सुरु हुइल ८५ दिनपाछे सार्वजनिक हुइल सुदूरपश्चिम प्रदेश सरकारके चालु आर्थिक वर्ष २०८३÷८४ के बजेटहे लेके सत्तारुढ दलभित्रर विवाद उठल रहे । बजेट निर्माणमे बिचौलियाके प्रभाव, कमिसनके खेल ओ पहुँचके आधारमे योजना छनोट करल कैके आरोप लाग्के बजेट विवादमे तानल रहे । 
आर्थिक मामिलामन्त्री चक्रबहादुर मल्ल आइतबार प्रदेशसभामे ३७ अर्ब ७० करोड रुपैयाँके बजेट प्रस्तुत करल रहे ।