राजमार्ग सुरक्षा ओ ट्राफिक व्यवस्थापन कार्यालय अत्तरिया कैलालीसे भदौ महिनाम करल काम कारबाहीके विवरण सार्वजनिक कर्ले बाटै ।
पत्रकार सम्मेलमार्फत सुदूरपश्चिम प्रदेशके ९ जिल्लाम भदौ महिनाम किल २१६ थो सवारी दुर्घटना हुइल कैके जनाइल बाटै । सो दुर्घटनाम १२ जनाके मृत्यु हूइल बा कलेसे ३५ जाने गम्भीर घाइते ओ ३३० जाने सामान्य घाइते हुइल राजमार्ग सुरक्षा ओ ट्राफिक व्यवस्थापन कार्यालय अत्तरिया कैलालीके प्रमुख एवं प्रहरी उपरीक्षक नवराज कार्की जानकारी देल ।
प्रदेश ट्राफिक प्रहरी कार्यालयके विवरणअनुसार भदौ १ गतेसे ३० गतेसम्म हुइल दुर्घटनाम ९ जनाके घटनास्थलम ओ उपचारके क्रमम थप ३ जनाके मृत्यु हूइल उहा बतैल । यहे अवधिम ट्राफिक नियम उल्लंघन कैके सवारी चलैना ३ हजार ३५५ थो सवारीसाधनहे कारबाही करल उहाके भनाइ बाटिन् ।
कारबाहीसे २७ लाख ४८ हजार ५०० रुपैयाँ जरिवाना संकलन हूइल विवरणम उल्लेख बा । ओस्तके मादक पदार्थ सेवन कैके सवारी चलैना ५९३ जाने चालकहे कारबाही कैके ३ लाख ४० हजार ५०० रुपैयाँ जरिवाना कर्ले बाटै ।सार्वजनिक यात्रुवाहक सवारी साधनके चालकहुकनके लागुपदार्थ सेवन चेकजाँचके क्रमम ६ जाने चालकम पोजेटिभ देखैल कारण आवश्यक कारबाहीके लाग जिल्ला प्रहरी कार्यालय पठाइल ओ चालक अनुमति पत्र निलम्बनके लाग यातायात व्यवस्था कार्यालयम पठाइल बाटै । ट्राफिक प्रहरीहुक्रे सवारी धनी नैखुलल मोटरसाइकल नियन्त्रणम लेना अभियानसमेत सञ्चालन कर्तीरहल जनाइल बाटै । , सडक सुरक्षा सुधारके लाग विभिन्न अभियान, सवारीसाधनके यान्त्रिक परीक्षण ओ ट्राफिक व्यवस्थापनके कार्यक्रम सञ्चालन कर्ती रहल विवरणमे उल्लेख बा ।
