कञ्चनपुरके पश्चिमी गड्डाचौकी नाका होके नेपाल–भारत आवागमन आजसे सहज हूइल बा । लगातारके वर्षाके कारण महाकाली नदीम पानीके बहाव एक लाख क्यसेक पार कर्के दुई दिनसे शारदा ब्यारेज (बनवासा पुल) म चार पाङ्ग्रे सवारीसाधन आवागमनम रोक लगाइल रहे ।  
जिल्ला प्रहरी कार्यालय कञ्चनपुरके प्रवक्ता एवं प्रहरी नायब उपरीक्षक टेकबहादुर रावत आज बिहान के महाकाली नदी पानीके बहाव घट्के बनवासा पुल पूर्ण रूपम सञ्चालन हूइल जानकारी देल । प्रहरीके अनुसार आब पानीके बहाव ९८ हजार क्यसेक मापन कर्ले बा । 
भारतीय पक्षसे एक लाख क्युसेक बहाव नाहाङ्के पुल जीर्ण हूइल कारण देखैती भारी सवारीसाधन सञ्चालनम रोक लगैती आइल रहे । कञ्चनपुरके महेन्द्रनगरसे काठमाडौँ, पोखरालगागत स्थानके लाग आजसे यातायात सेवा सञ्चालन हूइल महाकाली बहुउद्देश्यीय यातायात कम्पनी प्रालिके अध्यक्ष नविन भट्ट जानकारी देल  ।
“वर्षाके कारण काठमाडौँके यात्रुवाहक बस चार दिनसे ओ सुदूरपश्चिमके पहाडी जिल्लाम तीन दिनसे यातायात बन्द कर्ल रहित । ”, अध्यक्ष भट्ट कल , “मौसमम सुधार आइल सँगे यातायात सेवा फेन आजसे सुरु हूइल बा ।