सुदूरपश्चिम विश्वविद्यालयअन्तर्गतके विभिन्न क्याम्पसके स्वतन्त्र विद्यार्थी युनियन (स्ववियु) के अध्यक्षहूकन विद्यार्थीके शैक्षिक ओ प्रशासनिक समस्या समाधान करेलाग विश्वविद्यालय प्रशासनसमक्ष २५ बुँदे संयुक्त मागपत्र बुझाइल बाटै । 
स्ववियु निर्वाचनपाछे विभिन्न क्याम्पसके विद्यार्थीहूक्र प्रतिनिधि विद्यार्थीके साझा समस्या पहिचान कैके विश्वविद्यालयके उपकुलपति प्राध्यापक डा. किसनदत्त भट्ट, रजिस्ट्रार प्राध्यापक डा. तारादत्त भट्ट ओ परीक्षा नियन्त्रक डा. अनुराधा रोकायाके उपस्थितिम मागपत्र बुझाइल बाटै । 
कैलाली बहुमुखी क्यमपसके स्ववियु अध्यक्ष सन्तोष पन्तके अनुसार मागपत्रम परीक्षा सञ्चालन ओ नतिजा प्रकाशन, शुल्क, छात्रवृत्ति, इन्टर्नसिप, रोजगारीके अवसर, शैक्षिक क्यालेन्डर, क्याम्पसके भौतिक संरचना ओ विद्यार्थी कल्याणसँगे सम्बन्धित विषयहे प्राथमिकताके साथ उठाइल बाटै । 
विद्यार्थीहूकनके परीक्षाके पुनर्योगके लाग अनलाइनसे आवेदन देहे सेक्ना व्यवस्था करेलाग माग कर्ले बाटै । पुनर्योगपाछे विद्यार्थीके नतिजा सुधार होके पुनर्योगबापत लेहेल शुल्कसमेत फिर्ता करेपर्ना उहाहूकनके माग बाटीन् ।
विश्वविद्यालयसे विभिन्न विश्वविद्यालय, क्याम्पस ओ संघसंस्थासँग करल सम्झौता कार्यान्वयन कैके विद्यार्थीके लाग इन्टर्नसिप ओ अन्तरक्रियाके कार्यक्रम सञ्चालन करेपर्ना माग रहल उहा बतैल । अस्ते  नतिजा प्रणालीम सापेक्ष मूल्याङ्कन प्रणाली लागू करेपर्ना, प्रत्येक क्याम्पसके स्ववियु प्रतिनिधिहे क्याम्पसके विभिन्न समितिम सहभागी करेपर्ना ओ विश्वविद्यालय सभामे समेत स्ववियुके प्रतिनिधित्व सुनिश्चित करेपर्ना मागपत्रम उल्लेख बा ।
ओस्तके, सब सेमेस्टरके परीक्षा शैक्षिक क्यालेन्डरअनुसार समयमै सञ्चालन कैके नतिजा फेन तोकल समयमै प्रकाशन करेपर्ना विद्यार्थीहूकनके माग बातीन् । मध्यावधि परीक्षा व्यवस्थित ओ अनिवार्य बनाइलाग ओ आन्तरिक मूल्याङ्कनके अंकहे समेत अन्तिम नतिजा ओ प्रमाणपत्रमे स्पष्ट रूपम समावेश करेपर्ना उहाहूक्र बताइल बाट ।
अनलाइन परीक्षा फाराम प्रणालीहे व्यवस्थित बनाइपर्ना ओ प्रश्नपत्र निर्माण, उत्तरपुस्तिका परीक्षण ओ आन्तरिक एवं प्रयोगात्मक मूल्याङ्कनम देखैना त्रुटि नियन्त्रण करेपर्ना मागसमेत विद्यार्थीहूक्रे धर्ले बाटै । 
विश्वविद्यालयअन्तर्गतके क्याम्पसके जग्गा ओ भौतिक सम्पत्तिके संरक्षण करेपर्ना, पहाडी क्षेत्रके क्याम्पसके विद्यार्थीहूकन प्रतिलिपि ओ अस्थायी प्रमाणपत्र सात दिनभित्रर उपलब्ध कर्ना व्यवस्था करेपर्ना माग फेन संयुक्त मागपत्रम समेटल बाटै । 
विश्वविद्यालय सेवा आयोगहे सक्रिय बनाके आवश्यक विषयम दक्ष प्राध्यापकके विज्ञापन ओ पदपूर्ति प्रक्रिया आघे बढाइपर्ना विद्यार्थीहूकनके माग बातीन् । करार ओ कोटाम कार्यरत प्राध्यापकहे समेत खुला प्रतिस्पर्धासे छनोट कर्ना व्यवस्था करेपर्ना उहाहूक्र बताइल बाटै । अध्ययनके क्रममे आकस्मिक समस्या भोग्ना विद्यार्थीहूकन् सहयोग कर्ना आकस्मिक विद्यार्थी सहायता कोष स्थापना करेपर्ना माग फेन विद्यार्थी प्रतिनिधिहूक्रे आघे सारल बाटै । स्ववियुके अध्यक्षहूकनहे निर्वाचन सेक्के विद्यार्थीके समस्या ओझेलम नैपर्ना कैके विश्वविद्यालय प्रशासनहूकन  विद्यार्थीके समस्या सुन्ना, नियमित छलफल कर्ना ओ समाधानके लाग निरन्तर पहल कर्ना व्यवस्था करेपर्ना जोड देहशेल बाटै ।
संयुक्त मागपत्रमे कैलाली बहुमुखी क्याम्पस स्ववियु अध्यक्ष सन्तोष पन्त, दुर्गालक्ष्मी बहुमुखी क्याम्पसके अध्यक्ष भुवन महरा, टीकापुर बहुमुखी क्याम्पसके अध्यक्ष किरण साउद, दार्चुला बहुमुखी क्याम्पसके अध्यक्ष प्रकाश बडु, गोकुलेश्वर बहुमुखी क्याम्पसदार्चुलाके अध्यक्ष सुनिल डाँगा, बाजुरा बहुमुखी क्याम्पसके अध्यक्ष सचिन रावत, जयपृथ्वी बहुमुखी क्याम्पस बझङके अध्यक्ष तिलकचन्द्र बोहरा, त्रिवेणी बहुमुखी क्याम्पस बाजुराके अध्यक्ष प्रकाश अवस्थी, पाटन बहुमुखी क्याम्पस बैतडीके अध्यक्ष सञ्जय भण्डारी, जगन्नाथ बहुमुखी क्याम्पसके अध्यक्ष रोशन भट्ट, सिताराम बहुमुखी क्याम्पसके अध्यक्ष उमेश बलायर, मणिलेक बहुमुखी क्याम्पसके अध्यक्ष मनोजदत्त ओझा ओ घण्टेश्वर सेती महाकाली बहुमुखी क्याम्पस डोटीके अध्यक्ष सुरत बोहरालगायतके हस्ताक्षर रहल बा । 
विद्यार्थी प्रतिनिधिहूक्रे मागपत्रम उठाइल विषयहे गम्भीरतापूर्वक लेके विश्वविद्यालय प्रशासनहे तत्काल आवश्यक प्रक्रिया आघे बढैपर्ना उहाहूक्रे बताइल बाटै ।