मौसम पूर्वानुमान महाशाखा असोज ९ गते से ११ गते सम्म नेपालम धेरै भारी वर्षा से अति भारी वर्षाके सम्भावना रहल बा कैके अलर्ट जारी कर्ले बा । 
सोही सूचनाके आधारम सुदूरपश्चिम प्रदेशम फेन उच्च सतर्कता अपनाइलाग मौसम कार्यालय, स्थानीय तह लगायत विभिन्न संघ संस्थासे आग्रह कर्ल बाट ।
महाकाली बेसिन फिल्ड कार्यालयके कार्यालय प्रमुख ई. सञ्जय कुमार शाह मौसम पूर्वानुमान महाशाखासे जारी करल सूचना अनुसार सुदूरपश्चिमके ३ जिल्ला हाई अलर्टम रहल बतैल । उहाके अनुसार दार्चुला, बाजुरा ओ बझाङहे हाई अलर्टम धर्ल बाट । 
यी जिल्ला सँगे प्रदेशके अन्य सब जिल्लाम फेन सतर्कता रहलाग आवश्यक रहल उहा बतैल । सोही अनुसार कार्यालयहूक्र विभिन्न माध्यमसे सुदूरपश्चिमके जनताहूकन पूर्व सूचना देना काम कर्ती रहल उहा बतैल  ।
उहा प्रदेशम बाढीके पूर्व सूचना देना ३६ थो रडार लेभल सेन्सर जडान करल बतैल बाट ।  पानीके बहाव बढल बा या घटल बारम हरेक १०–१० मिनेटके तथ्याङ्क देना करल बाट  । जेम जनता सजिलो होके मोबाइलसे हेरे सेक्ना उहा बतैल । उहा जोखिम बढ्लसे मोबाइलम मेसिज फेन पठैना कैके बताइल बाट । 
उहा कल कम समयम ज्यादा पानी पर्नाके कारण जोखिम ज्यादा हुइना होके असिन बेला सजकता अपनाइकलाग आवश्यक रहल बतैल । असिन बेला जोखिम पहिचान करल क्षेत्रके जनताहूकन सुरक्षित ठाउँम स्थानान्तरण कर्ना आवश्यक हुइना उहा जानकारी देहेल बाट ।
मौसम पूर्वानुमान महाशाखा असोज ९से ११ गते गण्डकी ओ लुम्बिनी प्रदेशम ज्यादा भारी वर्षा ओ अति भारी वर्षा ओ मधेस, कोसी, बागमती ओ सुदूरपश्चिम प्रदेशम फेन भारी भारी वर्षा ओ कर्णाली प्रदेशम फेन कम वर्षाके सम्भावना रहल जनाइल बाट । 
उत्तर अन्डरमान सागर ओ आसपासके क्षेत्रम विकसित न्यून चापीय क्षेत्र हाल बगांलके खाडीके मध्य भू–भाग आसपासम रहल ओ उक्त प्रणाली थप शक्तिशाली बन्ती बलियो न्यून चापीय क्षेत्र होके पश्चिम उत्तर पश्चिम दिशातिर सर्ना देखाइल महाशाखाहूक्र जनाइल बाटै । 
सोही सूचनाके आधारम यहे क्षेत्रके स्थानीय तहम फेन सतर्कता अपनाइलाग आग्रह कर्ती सूचना जारी कर्ल बाट । 
सुदूरपश्चिमम विभिन्न स्थानीय तह सँगे यहे क्षेत्रम काम कर्ना संघसस्थाहूक्र फेन मौसम पूर्वानुमान महाशाखाके बुलेटीनके आधारम विभिन्न माध्यमसे सूचना प्रभाव कर्ना काम कर्ती रहल बाट ।  धेर जोखिम हूइल ठाउँम माइकिङ समेत कर्के सूचना प्रवाह कर्ना काम हूइती बा ।