कञ्चनपुरके शुक्लाफाँटाम तीन मोटरसाइकल चित्तलसंग ठोक्कर लाग बा ।  
शुक्लाफाँटा नगरपालिका–५ अर्जुनीस्थित महेन्द्र राजमार्गम तीन थो मोटरसाइकल ठोक्कर लाग्के चित्तल मरल बा । सो दुर्घटनाम  दुइ जाने घाइते हूइल बाटै कलेसे  दुई मोटरसाइकलके चालकहे सामान्य चोटपटक लागल प्रहरीहूक्र जनाइल बाटै । सोमबार साझके करिब ४ बजे धनगढीसे महेन्द्रनगर ओहर जैती रहल तीन थो मोटरसाइकल शुक्लाफाँटा राष्ट्रिय निकुञ्ज क्षेत्रसे सडक पार कर्ती रहल चितलसँग ठोक्कर लागल रह ।  
सो दुर्घटनाम सुदूरपश्चिम प्रदेश ०२–००४ प ७७५५ नम्बरके मोटरसाइकलके चालक सुन्दर भट्ट ओ पाछे सवार उहाके श्रीमती गंगादेवी भट्ट घाइते हूइल बाटिन् । उहाहूकन उपचारके लाग धनगढीस्थित माया मेट्रो अस्पताल पठाइल प्रहरीहूक्र जनाइल बाट । 
अस्तके, सुदूरपश्चिम प्रदेश ०१०–११ प ६४०७ ओ सुदूरपश्चिम प्रदेश ०२–००४ प ३८४२ नम्बरके मोटरसाइकल फेन दुर्घटनाम संलग्न रहे । यी दूनू मोटरसाइकलके चालकहे सामान्य चोटपटक लागल ओ उपचारपाछे अवस्था सामान्य रहल प्रहरीहूक्र जनाइल बाट । 
प्रहरीके अनुसार चितल शुक्लाफाँटा राष्ट्रिय निकुञ्ज क्षेत्रसे सडक पार कर्ना क्रमम मोटरसाइकलसँग ठक्कर लागल  कैके प्रारम्भिक जानकारी बा । घटनाबारे थप अनुसन्धान हूइती बा ।