थारू समुदायके मौलिक धार्मिक ओ सांस्कृतिक परम्पराके रूपम रहँती आइल सखिया नाचके संरक्षण, प्रवद्र्धन ओ पुस्तान्तरणके लाग यहे वर्ष विशेष सखिया नाच प्रदर्शन आयोजना करे लाग बाटै । 
आयोजकसे सोमबार पत्रकार सम्मेलन  मार्फत यकर बारे जानकारी कर्ले रहित । 
असोज २१ गते दिनके ३ बजेसे साँझ ६ बजेसम्म धनगढी उपमहानगरपालिकाके अँगनम हुइना बा ।
कृष्णलीला ओ महाभारतके कथावस्तुमे आधारित गीतमे युवतीहूक्र सामूहिक रूपमे गैना ओ युवाहूक्र मन्द्राके तालम सखिया नाच नच्ना थारू समुदायके मौलिक पहिचान, धार्मिक आस्था, कला, भाषा, परम्परा ओ सामाजिक एकताके महत्त्वपूर्ण प्रतीक बा । परम्परागत रूपमे  अष्टमीसे सुरु होके दशैंभर हुँइती दीपावलीसम्म करिब एक महिनासम्म गाउँघरमे सखिया नाच नच्ना चलन रहँती आइल बा । 
तर पछिल्लो समय शिक्षा, रोजगारी, वैदेशिक पलायन ओ समय परिवर्तनसँगे यी परम्परा क्रमशः हेरैती गील ओ सीमित हुँइती गील अवस्था बा । असीन अवस्थामे मौलिक संस्कृति नयाँ पुस्तासम्म पुगैना, युवायुवतीहूकन आपन संस्कृति ओ परम्परासँग जोड्ना ओ सखिया नाचके संरक्षण ओ पुस्तान्तरणके लाग सामाजिक रूपमे सकारात्मक वातावरण निर्माण कर्ना उद्देश्यले कार्यक्रम आयोजना करे लागल आयोजकहूक्र जनाइल बाटै ।
यकरआघे सामाजिक सञ्जालमार्फत तीन दिनसम्म कार्यक्रम कर्ना जानकारी सार्वजनिक करल रहे । तर हाल गाउँघरमे धान कट्ना ओ अन्य कृषि कार्यके व्यस्तता रहल ओ कलाकार ओ समुदायके सहभागिताम असर परसेक्ना होके कार्यक्रमहे एक दिनमे सीमित कर्ना निर्णय करल आयोजकहूक्र बताइल बाटै ।  
कार्यक्रममे थारू समुदायके कलाकार, युवायुवती, संस्कृतिकर्मी ओ संस्कृति संरक्षणमे रुचि धर्ना विभिन्न सरोकारवालाके सहभागिता रहना बा  । आयोजकहूक्र यहे कार्यक्रमहे केवल नृत्य प्रदर्शनके रूपम किल नैहोके थारू समुदायके मौलिक संस्कृति, परम्परा, भाषा, कला ओ सांस्कृतिक पहिचानहे नयाँ पुस्तासम्म पुगैना अभियानके रूपमे लेहेल बताइल बाटै ।