कैलालीको टीकापुरसे चोरी हुइ भारतीय नम्बर प्लेटके मोटरसाइकलसहित तीन जाने पक्राउ परल बाटै । टीकापुर नगरपालिका–१ एकतानगरके धनबहादुर सोपके घरआँगनमे पार्किङ कैके धरल यूके ०६ बीजी २९६८ नम्बरके मोटरसाइकल चोरी हुइल कैके इलाका प्रहरी कार्यालय टीकापुरमे निवेदन परल रहे ।
प्रहरीहुक्र खोजतलास कर्ना क्रममे जानकी गाउँपालिका–३ भगतपुरसे चोरी हुइल मोटरसाइकलसहित तीन जानेहुकन पक्राउ कर्ले बाटै । पक्राउ पर्नामे टीकापुर नगरपालिका–१ नयाँ टीकापुरके २० वर्षीय आकाश बिष्ट ओ सोही वडाके एकतानगरके २४ वर्षीय भीम बराल ओ २४ वर्षीय नरेश रावल रहल बा ।
प्रहरीके अनुसार उनीहुकन मोटरसाइकल चोरी कैके लुकाइछिपाइ करल अवस्थामे फेला पार्ले बाटै ।  पक्राउ परल तीनौ जनेउपर कैलाली जिल्ला अदालतसे म्याद थप कैके थप अनुसन्धान हुइतीरहल जिल्ला प्रहरी कार्यालय कैलालीहुक्र जनाइल बाटै ।