सुदूरपश्चिम प्रदेश सरकारसे चालु आर्थिक वर्षमे राजनीतिक दलके कार्यालय भवन निर्माणके लाग बजेट विनियोजन कर्ले बाटै । आर्थिक वर्ष सुरु हुइल तीन महिनापाछे लानल बजेटमे विभिन्न राजनीतिक दलसँग सम्बन्धित भवन ओ प्रतिष्ठानके नाममे लाखौँ रुपैयाँ छुट्याइल बा । 
प्रदेश सरकारसे नेकपा एमालेसँग सम्बन्धित भवनहे मदन–आश्रित स्मृति भवन, नेपाली कांग्रेससँग सम्बन्धित भवनहे गणेशमान स्मृति भवन ओ नेपाली कम्युनिस्ट पार्टीमे समाहित होसेकल साविकके नेकपा एकीकृत समाजवादीसँग सम्बन्धित प्रतिष्ठानहे पुष्पलाल स्मृति प्रतिष्ठानके नामम बजेट देहेल बा ।
चालु आर्थिक वर्ष २०८३÷८४ के बजेटमे डडेल्धुरा, कैलाली, बाजुरा ओ अछाममे असीन भवन ओ संरचना निर्माणके लाग रकम विनियोजन कर्ले बा । डडेल्धुरामे मदन–आश्रित स्मृति भवनके नामसे एमाले पार्टी कार्यालय रहल बा । मदलन–आश्रित स्मृति भवन निर्माणके लाग प्रदेश सरकारसे १५ लाख रुपैयाँ विनियोजन कर्ले बा । सामाजिक विकास मन्त्रालयअन्तर्गतके सामाजिक विकास कार्यालय डडेल्धुरामार्फत कार्यान्वयन हुइना उक्त योजना परशुराम नगरपालिका–१२ मे कार्यान्वयन हुइना बताइल बाटै ।
ओस्तके, कैलालीके घोडाघोडीमे मदन–आश्रित पुस्तकालय ओ शौचालय निर्माणके लाग १० लाख रुपैयाँ छुट्याइल बा । बाजुराके बुढीनन्दामे मदन–आश्रित भवन निर्माणके लाग फेन १० लाख रुपैयाँ विनियोजन कर्ले बाटै । प्रदेश सरकारसे कैलालीके धनगढीमे पुष्पलाल स्मृति प्रतिष्ठान भवन निर्माणके लाग २० लाख रुपैयाँ छुट्याइल बा ।  ओस्तके, अछामके मंगलसेनमे गणेशमान सिंह सामुदायिक भवन निर्माणके लाग २५ लाख रुपैयाँ विनियोजन कर्ले बाटै । 
प्रदेश सरकारसे राजनीतिक दलके कार्यालय ओ तिनसँग सम्बन्धित भवन निर्माणके लाग बजेट छुट्याइल यी पहिलोपटक कलेसे नैहो । पछिल्लो नौ वर्षमे असिन शीर्षकमे १५ करोड रुपैयाँसे ज्यादा बजेट विनियोजन होसेकल बा ।